tikyo

              Dumating si Tikyo kahapon, ang bago kong ampon. Lilinga-linga at minsan tulala. Dala siya ng isa kong kaibigan, isinama mula sa daan. Tahimik lamang at malaki ang kanyang mga mata, waring nagmamasid lang tinatanong kung nasaan siya. Nanginginig kung minsan at balisa, madalas nakatungo o nakayuko yata sa hiya. Inalok ko ng pagkain pero hindi ako pinansin, baka busog pa o masama ang pakilasa.

                Kanina lang nagulo ang kuwarto ko dahil sa kanya, binuksan ko lang ang supot at nawala na siya. Sa sapatusan, sa ilalim ng kama hinanap ko na. Inalis ko ang aking mga maleta at binaliktad pa ang lamesa. Ang tangi kong makakasama parang lumisan nang maaga, dala ko pa naman pagkaing hinanda para sa kanya.

                Mahabang katawan, mapungay na mata. Batik-batik ang balat na magaspang ang salat. Apat ang paa at tsk tsk tsk tsk tsk kung tumawa. Hoy! Nariyan ka lang pala, sa pantalon ko pa sumampa. Huli ka, tayo parin ang magsasama. Ipinanghuli pa naman kita ng langaw at lamok, kung nawala ka nga sigurado ako naman ang magaamok.

ang inyong mga anak

Salin ni Novice Edward Lining Dantis mula sa

“Your children are not your children” ni Kahlil Gibran

“Hindi inyo ang iyong mga anak,

Anak sila ng buhay na nangungulila sa kaniyang sarili.

Nanggaling sila sa pamamagitan ninyo

ngunit hindi mula sa inyo,

nasa piling man ninyo sila, ngunit hindi sila sa inyo.

Maaring ibigay ninyo sa kanila ang inyong pagmamahal

ngunit hindi ang inyong pag-iisip.

Sa dahilang mayroon silang sariling isip.

Maibabahay ninyo ang kanilang katawan

ngunit hindi ang kanilang mga kaluluwa,

sa dahilang nananahan ang kanilang kaluluwa sa kinabukasan,

na hindi ninyo mabibisita,

kahit maging sa panaginip.

Maari ninyong subukang  maging gaya nila,

ngunit sikaping huwag gawin silang gaya ninyo.

Dahil tumatakbo ang buhay ng pasulong

at hindi nanatili sa nakaraan.

Kayo ang pana kung saan inilulunsad ang inyong mga anak

bilang buhay na palaso.

Nababanaag ng mamamana ang tanda sa daan ng walang hanggan,

at babatakin Niya kayo ng buo Niyang lakas

ng pumailanlang ng malayo at mabilis ang Kaniyang palaso.

Hayaang maging para sa kagalakan

ang pagbatak sa inyo ng kamay ng mamamana;

Dahil gaano man niya kamahal ang palasong pumapailanlang,

Ganun din niya kamahal ang panang matatag.